Աշխարհում ամենայուրօրինակ թանգարաններից մեկը ծավալային տառերի թանգարանն է Բեռլինում (Buchstabenmuseum): Այսօր թանգարանի հավաքածուն ներառում է արտաքին գովազդի 500-ից ավել աշխատանք, որոնք տարբեր պատճառներով փոխարինվել են նորերով: Ընկերությունները որոշում են ազատվել հնացած արտաքին գովազդից մի շարք պատճառներով, օրինակ՝ տպագրության ոլորտում հնացած տառատեսակները փոխարինվում են ավելի թրենդային տառատեսակներով, սկսում են գովազդային նոր արշավ կամ լուսավորվող կոնստրուկցիաները շարքից դուրս են գալիս: Մաշված և հնացած տառերի ցուցադրությունը յուրատեսակ հարգանքի տուրք է ճարտարապետների, դիզայներների և գովազդը պատրաստողների աշխատանքին, քանի որ յուրաքանչյուր տառի ստեղծումը տքնաջան աշխատանք է, որն արդյունքում դառնում է քաղաքի կենդանի պատմության մի մասը։ Բեռլինում գտնվող թանգարանի եռաչափ տառերից յուրաքանչյուրի պատմությունը հուզիչ և երբեմն անհավատալի է:
Թանգարանը հիմնադրվելով 2005 թվականին՝ թանգարանային մասնագիտացված աշխատակից Անյա Շուլցը (գերմ.՝ Anja Schulz) և դիզայներ Բարբարա Դեշանթը (գերմ.՝ Barbara Dechant) ցուցադրանմուշները փնտրում էին ամբողջ Բեռլինով: Ի զարմանս հիմնադիրների՝ այլևս չօգտագործվող և անպիտան տառերը հանդիպում էին գրեթե ամենուր: Պատահական անցորդները լքված տառերը գտնում էին փողոցներում, աղբահանման վայրերում, քանդված շինությունների շրջակայքում: Նույնիսկ պատահում էր, որ թանգարանի տնօրենները ստիպված էին լինում գովազդային տառերը «որսալ» գետերի հատակից:
Թանգարանի հիմնական տաղավարների պատերը ներկված են սև գույնով, քանի որ տառերի ամբողջ գեղեցկությունը երևում է գիշերը, երբ միացված են լեդ լամպերը: Սակայն կան մի քանի լուսավոր սրահներ, որտեղ տառերը դասակարգված են ըստ գույների՝ դեղին, կապույտ, կարմիր:
Բեռլինում տեղակայված թանգարանում է գտնվում ամբողջությամբ աշխատող Zierfische գրությունը, որ գերմաներենից թարգմանվում է որպես «Ակվարիումային ձկներ»: Կենդանաբանական խանութի ցուցանակը պահպանվել է 1980-ական թվականներից: Այսօր թանգարանում կարող եք գտնել ոչ միայն վառ նեոնային լույսերով օրիգինալ ցուցանակը, այլ նաև դրա հեղինակ Մանֆրեդ Գենզիկեի (Manfred Gensicke) ճարտարապետական գծագիրը:
Մեկ այլ հուզիչ պատմություն կապված է գերմանական հանրահայտ հանրախանութի՝ Hertie-ի սնանկացման հետ: 2009 թվականին ընկերության աշխատակիցները կազմակերպել էին բողոքի ակցիա և կարմիր տառերով լայնամասշտաբ ցուցանակը խորտակել գետի մեջ: Իմանալով կատարվածի մասին՝ թանգարանի տնօրենները «որսացին» այն, և այժմ Hertie գրությունը զբաղեցնում է իր պատվավոր տեղը թանգարանային ցուցադրանմուշների շարքում:
Հնագույն ցուցադրանմուշներից է նաև 1947 թվականին պատրաստված Lederwaren (գերմ.՝ Կաշվե իրեր) ցուցանակը, որի նեոնային W տառը վերականգնվել է բեռլինյան համալսարաններից մեկի ուսանողների կողմից՝ ավարտական աշխատանքի շրջանակներում: Թանգարանի նմուշների զգալի մասը ներկայացված է սկզբնական արտադրական տեսքով, սակայն կան նաև ապամոնտաժված ցուցանակներ, որոնց միջոցով ցուցադրվում են կոնստրուկցիաների բաղկացուցիչ մասերը:
Լուսանկարների աղբյուրը՝ https://www.buchstabenmuseum.de/en/
